3 август 2021, сешанба

Кириш

Истанбулда ўзбекистонлик дея гумон қилинган шахс вафот этди

Туркияда ўзбекистонлик дея гумон қилинган шахс вафот этди. Бу ҳақда Ўзбекистоннинг Истанбулдаги Бош консуллиги хабар берди.

Таъкидланишича, Ўзбекистоннинг Истанбулдаги Бош консуллигига 2021 йил март ойида юборилган факсограммада 2020 йил октябрь ойи бошларида кучли заҳарланиш оқибатида ҳушини йўқотган, шахсини тасдиқловчи ҳужжат ва мобил телефонига эга бўлмаган шахс Истанбул шаҳридаги «Göztepe prof. dr. Süleyman Yalçın şehir hastanesi»га ётқизилгани, кейинчалик «Cinar 2 Bakım Merkezi»га кўчирилгани маълум қилинган.

Ушбу шахс интенсив терапия бўлимига ўтказилишидан олдин ўзини 1987 йилда туғилган «Саид Номатов» деб айтган (Ўзбекистон фуқароси бўлиш мумкин).

«Бош консуллик ходимлари томонидан кўп маротаба шифохонага ташриф амалга оширилишига қарамасдан, шахснинг аҳволи ўта оғирлиги туфайли унинг исми шарифи ва қайси давлат фуқароси эканига ойдинлик киритиш имкони бўлмади», — дейилади консуллик хабарида.

Фуқаро 23 март куни «Cinar 2 Bakım Merkezi»да вафот этган.

Шу муносабат билан, консуллик ушбу шахсни таниганлардан Истанбулдаги Бош консулхонага ёки Ташқи меҳнат миграцияси агентлигининг Истанбулдаги вакилига +90 (212) 3232037 рақами орқали мурожаат қилишларини сўрамоқда.